الله المستعان
هكذا انتهت محادثتنا ولقاءنا على وعد بلقاء اليوم التالي في المكان المتفق عليه والموعد
كان هذا حديثي مع اخواني لجنة المؤتمر الصحفي الذي أقامه اخوان البحيرة في مكتب نواب مجلس الشعب
الحمد لله صحيت للفجر وكله تمام وما نمناش اصلا
ودقت الساعه الثانية عشر وبدأت حالة الاستنفار
عملت شوية اتصالات ونزلت المكتب ايه ده ؟؟؟؟
ايه اللي انا شايفه ده
عربيات امن مركزي خضرا
وخلوا بالكم من الخضرا وكانت نضيفة والله وجديدة وبتلمع وبالضمان ومعاها الكاتالوج ومن اسكندرية
وييييييييييييييي
ظباط امن الدولة كلهم عند العمارة والمكتب
مدير امن المديرية بذات نفسه هو ايضا قدام الباب
رئيس نيابة امن الدولة كان هو الاخر عند الباب
المنطقة كلها مافيش مدخل عمارة ولا بيت الا وفيه مخبرين وجراية وظباط
حتى كشك كان على جنب حبينا نجيب منه كنز ميرندا "للتمويه" لاقينا فيه مخبر وبيبص لنا بطريقة غريبة
المهم احنا نلف ونروح ونيجي على اننا نلاقي مكان نعرف نلقط منه صور مش عارفين
كل اما نروح مكان نلاقيه متغرق مخبرين وجراية
وبدأ الحصار
مع بداية المؤتمر الصحفي بحضور مندوبين من جرائد ( الدستور - المصري اليوم - النبأ - الشعب - قناة الجزيرة - ابو ظبي مدونة مش انا - مدونة اخوانجي - مدونة سمسم حر ) ولله الحمد
مع بداية المؤتمر وجدنا الحشود الأمنية تتوافد بطريقة مرعبة حتى أننا ظننا أنه سيكون هناك اقتحام للمكتب فقمنا بتأمين عملية القبض علينا وخرجت أنا والأخ علاء صاحب مدونة مش انا خارج المكتب وخارج العمارة كلها لتغطية وتصوير عملية الاقتحام
وأجاركم الله ... كانت مهمة صعبة جدا
كانت درجة الحرارة مرتفعه جدا لدرجة اننا شربنا تلات مرات عصير وجبنا مناديل وجالي هبوط من الحر
ونلف ونرجع
نلف ونرجع
لدرجة ان الظباط بدأوا يشكوا فينا
قمنا عملنا ايه بقى
على القهوة واقعد
يا أخ علاء شاي ولا شيشة ؟
بقولك ايه يا اخ اخوانجي احنا يلا بينا نفطر وبعد كده نشوف اخرتها معاهم ايه
قمنا فطرنا ونزلنا تاني نشوف الوضع ايه كان الوضع خطيييييييير جدا
الأخوة اتحاصروا يا جدعان
الاخوان اتحاصروا يا جدعان
اقرا الحادثة الاخوان اتحاصرواااااا
وفجأة الحمد لله انفك الحصار وخرج الجميع سالمين غانمين بفضل الله
ونرجع امر فك الحصار الى ان القيادة الامنية حينما علمت بوجود صحافة واعلام في المكتب اختشوا على دمهم وخافت شوية من الضجة الاعلامية اللي ممكن تحصل
والآن ممكن نترك لكم حرية مشاهدة الصور
المكان الذي عليه العلامة هو تجمع قيادات الأمن ونعتذر عن عدم التقريب أكثر من ذلك لأسباب أمنية
مكان تجمع ظباط أمن الدولة ومخبريها الأشاوس
قوات الأمن المركزي ذات اللون الأخضر كما قلت لكم
بوركتم
والسلام مسك الختام
ليست هناك تعليقات:
إرسال تعليق